17 ನಿಮಿಷ 18 ಸೆಕೆಂಡ್ಗಳಲ್ಲಿ ಡ್ರೋನ್ ಜೋಡಣೆ; ಸೊರಬದ ಬಾಲಕ ವಿರಾಟ್ ನ ವಿಶ್ವ ದಾಖಲೆ | Shivamogga’s 7th standard student Virat S sets an International Book of Records achievement by assembling a freestyle FPV drone in just 17 minutes and 18 seconds.
ಶಿವಮೊಗ್ಗ: ಸೊರಬ ತಾಲೂಕಿನ ಜಡೆ ಗ್ರಾಮದ ಕೃಷಿಕ ದಂಪತಿಯ ಪುತ್ರ ವಿರಾಟ್ ಎಸ್. ಬಾಲ್ಯದಲ್ಲೇ ತಾಂತ್ರಿಕ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದು, ಕೇವಲ 17 ನಿಮಿಷ 18 ಸೆಕೆಂಡ್ಗಳಲ್ಲಿ ಫ್ರೀಸ್ಟೈಲ್ FPV ಡ್ರೋನ್ ಜೋಡಿಸುವ ಮೂಲಕ ಇಂಟರ್ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್ಸ್ನಲ್ಲಿ ತನ್ನ ಹೆಸರನ್ನು ದಾಖಲಿಸಿಕೊಂಡಿದ್ದಾನೆ.
ಜಡೆ ಗ್ರಾಮದ ಶಿವಕುಮಾರ ಸ್ವಾಮಿ ಹಾಗೂ ಆರ್.ಕೆ. ಅರುಣಾ ದಂಪತಿಯ ಪುತ್ರನಾಗಿರುವ ವಿರಾಟ್, ಪ್ರಸ್ತುತ ಬೆಂಗಳೂರಿನಲ್ಲಿ 7ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾನೆ.
ವಿರಾಟ್ ಜೋಡಿಸಿರುವುದು ಸಾಮಾನ್ಯ ಡ್ರೋನ್ ಅಲ್ಲ. ಫ್ರೀಸ್ಟೈಲ್ FPV ಡ್ರೋನ್ನಲ್ಲಿ ಪೈಲಟ್ ವಿಶೇಷ VR ಗಾಗಲ್ಸ್ ಧರಿಸಿ, ಡ್ರೋನ್ನ ಕ್ಯಾಮೆರಾ ಮೂಲಕ ನೇರವಾಗಿ ಕಾಣುವ ದೃಶ್ಯವನ್ನು ಆಧರಿಸಿ ಡ್ರೋನ್ನ್ನು ನಿಯಂತ್ರಿಸುತ್ತಾನೆ. ಫ್ರೀಸ್ಟೈಲ್ ಡ್ರೋನ್ಗಳಲ್ಲಿ ವೇಗಕ್ಕಿಂತಲೂ ಗಾಳಿಯಲ್ಲಿ ವಿವಿಧ ರೀತಿಯ ಚಲನೆ, ರೊಟೇಷನ್ ಹಾಗೂ ಸಾಹಸಮಯ ಹಾರಾಟಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ.
ಬಿಡಿಭಾಗಗಳಿಂದ FPV ಡ್ರೋನ್ನ್ನು ಜೋಡಿಸುವುದು ಸುಲಭದ ಕೆಲಸವಲ್ಲ. ಕಾರ್ಬನ್ ಫೈಬರ್ ಫ್ರೇಮ್ಗೆ ಸ್ಕ್ರೂಗಳನ್ನು ಅಳವಡಿಸುವುದು, ಬ್ರಷ್ಲೆಸ್ ಮೋಟರ್ಗಳನ್ನು ಜೋಡಿಸುವುದು, ಫ್ಲೈಟ್ ಕಂಟ್ರೋಲರ್ ಹಾಗೂ ಇತರ ಬೋರ್ಡ್ಗಳಿಗೆ ವೈರಿಂಗ್ ಮತ್ತು ಸೋಲ್ಡರಿಂಗ್ ಮಾಡುವುದು, ಕ್ಯಾಮೆರಾ ಹಾಗೂ ರಿಸೀವರ್ಗಳನ್ನು ಅಳವಡಿಸುವುದು ಸೇರಿದಂತೆ ಹಲವು ಹಂತಗಳನ್ನು ಪೂರ್ಣಗೊಳಿಸಬೇಕಾಗುತ್ತದೆ.
ಸಾಮಾನ್ಯವಾಗಿ ಈ ಪ್ರಕ್ರಿಯೆಗೆ ನುರಿತ ತಜ್ಞರಿಗೂ ಸಾಕಷ್ಟು ಸಮಯ ಬೇಕಾಗುತ್ತದೆ. ಆದರೆ ವಿರಾಟ್ 2025ರ ಡಿಸೆಂಬರ್ 31ರಂದು ಕೇವಲ 17 ನಿಮಿಷ 18 ಸೆಕೆಂಡ್ಗಳಲ್ಲಿ ಡ್ರೋನ್ ಜೋಡಣೆ ಪೂರ್ಣಗೊಳಿಸಿ ದಾಖಲೆ ನಿರ್ಮಿಸಿದ್ದಾನೆ.
ತನ್ನ ತಾಂತ್ರಿಕ ಆಸಕ್ತಿಯ ಕುರಿತು ಮಾತನಾಡಿರುವ ವಿರಾಟ್, ಬೆಂಗಳೂರಿನ ಶಾಲೆಯಲ್ಲಿ 5ನೇ ತರಗತಿಗೆ ಸೇರಿದಾಗ ಪರಿಚಯವಾದ ರೋಬೋಟಿಕ್ಸ್ ತರಗತಿಗಳಿಂದ FPV ಡ್ರೋನ್ಗಳ ಬಗ್ಗೆ ಆಸಕ್ತಿ ಮೂಡಿತು ಎಂದು ಹೇಳಿದ್ದಾರೆ. ಬಳಿಕ ಮೊಬೈಲ್ ಮೂಲಕ ಮಾಹಿತಿ ಸಂಗ್ರಹಿಸಿ, ಪೋಷಕರ ಪ್ರೋತ್ಸಾಹದೊಂದಿಗೆ ಈ ಸಾಧನೆ ಮಾಡಿರುವುದಾಗಿ ತಿಳಿಸಿದ್ದಾರೆ.
“ಈ ಸಾಧನೆ ನನಗೆ ತುಂಬಾ ಸಂತಸ ತಂದಿದೆ. ಮುಂದಿನ ಅಕ್ಟೋಬರ್ ದಸರಾ ಸಮಯದಲ್ಲಿ ನಾನು ನಿರ್ಮಿಸಿರುವ ಈ ದಾಖಲೆಯನ್ನು ನಾನೇ ಮುರಿಯಲು ಬಯಸಿದ್ದೇನೆ. ಅದಕ್ಕಾಗಿ ಈಗಿನಿಂದಲೇ ಸಿದ್ಧತೆ ನಡೆಸುತ್ತಿದ್ದೇನೆ,” ಎಂದು ವಿರಾಟ್ ಹೇಳಿದ್ದಾರೆ.
ಕೃಷಿಕ ಕುಟುಂಬದ ಬಾಲಕನೊಬ್ಬ ತಂತ್ರಜ್ಞಾನ ಕ್ಷೇತ್ರದಲ್ಲಿ ಆಸಕ್ತಿ ಬೆಳೆಸಿಕೊಂಡು ಅಂತಾರಾಷ್ಟ್ರೀಯ ಮಟ್ಟದ ದಾಖಲೆಗೆ ಪಾತ್ರರಾಗಿರುವುದು ಜಡೆ ಗ್ರಾಮದ ಹೆಮ್ಮೆಗೆ ಕಾರಣವಾಗಿದೆ.
