ರೈಲ್ವೆ ಹಳಿ ಬಳಿ ಗಂಭೀರ ಗಾಯಗೊಂಡಿದ್ದ ಯುವಕ ಆನಂದ್ ಚಿಕಿತ್ಸೆ ಫಲಿಸದೆ ಸಾವು | 26-year-old Anand, found seriously injured near railway tracks in Shivamogga, died at McGann Hospital after his family struggled to afford further treatment at a private hospital.
ಶಿವಮೊಗ್ಗದ ರೈಲ್ವೆ ಹಳಿಯ ಸಮೀಪ ಬುಧವಾರ ಬೆಳಿಗ್ಗೆ ಗಂಭೀರ ಗಾಯಗಳೊಂದಿಗೆ ಪತ್ತೆಯಾಗಿದ್ದ 26 ವರ್ಷದ ಯುವಕ ಆನಂದ್, ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಗುರುವಾರ ಬೆಳಿಗ್ಗೆ 6.45ರ ಸುಮಾರಿಗೆ ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಯಲ್ಲಿ ಅವರು ಕೊನೆಯುಸಿರೆಳೆದಿದ್ದಾರೆ.
ಆರಂಭದಲ್ಲಿ ಆನಂದ್ ಅವರನ್ನು ಮೆಗ್ಗಾನ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ನಂತರ ಹೆಚ್ಚಿನ ಮತ್ತು ತುರ್ತು ಚಿಕಿತ್ಸೆಗಾಗಿ ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಲಾಯಿತು. ಆದರೆ, ಅಲ್ಲಿನ ದುಬಾರಿ ಚಿಕಿತ್ಸಾ ವೆಚ್ಚ ಭರಿಸಲು ಕುಟುಂಬಕ್ಕೆ ಸಾಧ್ಯವಾಗಲಿಲ್ಲ. ಅನಿವಾರ್ಯವಾಗಿ ಅವರನ್ನು ಮರಳಿ ಮೆಗ್ಗಾನ್ ಆಸ್ಪತ್ರೆಗೆ ಕರೆತರಲಾಯಿತು. ದುರಾದೃಷ್ಟವಶಾತ್, ಆನಂದ್ ಅವರನ್ನು ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ.
“ನಮ್ಮ ಬಳಿ ಇದ್ದ ₹7.40 ಲಕ್ಷ ಹಣವನ್ನು ಖಾಸಗಿ ಆಸ್ಪತ್ರೆಗೆ ಪಾವತಿಸಿದೆವು. ಆದರೆ, ಇದಕ್ಕೂ ಮೀರಿದ ಚಿಕಿತ್ಸಾ ವೆಚ್ಚವನ್ನು ಹೊಂದಿಸಲು ನಮಗೆ ಸಾಧ್ಯವಾಗಲಿಲ್ಲ. ಬೇರೆ ದಾರಿಯಿಲ್ಲದೆ ಅವರನ್ನು ಅಲ್ಲಿಂದ ಕರೆತಂದು ಮತ್ತೆ ಮೆಗ್ಗಾನ್‌ಗೆ ದಾಖಲಿಸಿದೆವು” ಎಂದು ಆನಂದ್ ಅವರ ಸಹೋದರಿ ತಮ್ಮ ಅಸಹಾಯಕತೆ ಮತ್ತು ನೋವನ್ನು ತೋಡಿಕೊಂಡಿದ್ದಾರೆ.
ಮೃತ ಆನಂದ್ ಶಾಮಿಯಾನ ಅಳವಡಿಸುವ ಕೆಲಸ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದರು. ಇವರ ಅಕಾಲಿಕ ಹಾಗೂ ನಿಗೂಢ ಸಾವಿನಿಂದ ಇಡೀ ಕುಟುಂಬ ತೀವ್ರ ಆಘಾತಕ್ಕೆ ಒಳಗಾಗಿದೆ..
ನಿಗೂಢ ಸಾವಿನ ಹಿಂದಿನ ಕಾರಣವೇನು?
ರೈಲ್ವೆ ಹಳಿ ಬಳಿ ಆನಂದ್ ಅಷ್ಟು ಗಂಭೀರವಾಗಿ ಗಾಯಗೊಂಡಿದ್ದು ಹೇಗೆ? ಇದು ಯಾರಾದರೂ ಮಾಡಿದ ಹಲ್ಲೆಯೇ ಅಥವಾ ಬೇರೆ ಯಾವುದಾದರೂ ಘಟನೆಯೇ ಎಂಬ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ. ಈ ಬಗ್ಗೆ ಹೆಚ್ಚಿನ ತನಿಖೆ ನಡೆಯಬೇಕಿದ್ದು, ಸತ್ಯಾಸತ್ಯತೆ ಇನ್ನಷ್ಟೇ ಹೊರಬರಬೇಕಿದೆ.
