ಹಸಿರುಮಕ್ಕಿ ಸೇತುವೆ ಕಾಮಗಾರಿಯಲ್ಲಿ ಕಮಿಷನ್ ಆರೋಪ: ₹50 ಲಕ್ಷ ವ್ಯವಹಾರದ ಬಗ್ಗೆ ಹಾಲಪ್ಪ ವಿರುದ್ಧ ಚೇತನ್ ರಾಜ್ ವಾಗ್ದಾಳಿ | Former Zilla Panchayat member Chetan Raj Kannur has accused former MLA Haratalu Halappa of seeking commission in the Hasirumakki bridge project and challenged him to respond to the allegations.
ಸಾಗರ: ಹಸಿರುಮಕ್ಕಿ ಸೇತುವೆ ಕಾಮಗಾರಿಗೆ ಸಂಬಂಧಿಸಿದ ಕಮಿಷನ್ ಆರೋಪ ಇದೀಗ ಸಾಗರದ ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಮಾಜಿ ಶಾಸಕ ಹರತಾಳು ಹಾಲಪ್ಪ ಅವರ ವಿರುದ್ಧ ಮಾಜಿ ಜಿಲ್ಲಾ ಪಂಚಾಯಿತಿ ಸದಸ್ಯ ಚೇತನ್ ರಾಜ್ ಕಣ್ಣೂರು ಗಂಭೀರ ಆರೋಪಗಳನ್ನು ಮಾಡಿದ್ದು, ಈ ಕುರಿತು ಬಹಿರಂಗವಾಗಿ ಚರ್ಚಿಸಲು ಸವಾಲು ಹಾಕಿದ್ದಾರೆ.
ಹಸಿರುಮಕ್ಕಿ ಸೇತುವೆ ಬಳಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಚೇತನ್ ರಾಜ್ ಕಣ್ಣೂರು, ಸೇತುವೆ ಕಾಮಗಾರಿಯ ಸಂದರ್ಭದಲ್ಲಿ ನೀರಿನ ಆಳ 20 ಅಡಿಯಿಂದ 70 ಅಡಿಗೆ ಹೆಚ್ಚಾದ ಹಿನ್ನೆಲೆಯಲ್ಲಿ ಗುತ್ತಿಗೆದಾರರು ಹೆಚ್ಚುವರಿ ಅನುದಾನಕ್ಕೆ ಬೇಡಿಕೆ ಇಟ್ಟಿದ್ದರು ಎಂದು ಹೇಳಿದ್ದಾರೆ.
ಈ ಸಂದರ್ಭದಲ್ಲಿ ಸರ್ಕಾರ ₹10 ಕೋಟಿ ಹೆಚ್ಚುವರಿ ಅನುದಾನ ನೀಡಲು ಮುಂದಾಗಿತ್ತು. ಆದರೆ, ಈ ಮೊತ್ತವನ್ನು ₹11 ಕೋಟಿಗೆ ಹೆಚ್ಚಿಸುವಂತೆ ಮಾಡಿ, ₹1 ಕೋಟಿ ಕಮಿಷನ್‌ಗೆ ಬೇಡಿಕೆ ಇಡಲಾಗಿತ್ತು ಎಂಬ ಆರೋಪವನ್ನು ಅವರು ಮಾಡಿದ್ದಾರೆ. ಬಳಿಕ ಮಧ್ಯವರ್ತಿಯ ಮೂಲಕ ₹50 ಲಕ್ಷಕ್ಕೆ ವ್ಯವಹಾರ ಇತ್ಯರ್ಥವಾಗಿತ್ತು ಎಂದೂ ಚೇತನ್ ರಾಜ್ ಆರೋಪಿಸಿದ್ದಾರೆ.
“ಆ ಸಂದರ್ಭದಲ್ಲಿ ನಾನು ಅವರ ಜೊತೆಯಲ್ಲೇ ಇದ್ದೆ. ಹಣದ ವಹಿವಾಟಿನ ಬಗ್ಗೆ ನನಗೆ ಸಂಪೂರ್ಣ ಮಾಹಿತಿ ಇದೆ. ₹35 ಲಕ್ಷ ಯಾವಾಗ ಬಂದಿತು, ಉಳಿದ ₹15 ಲಕ್ಷ ಯಾರಿಗೆ ತಲುಪಿತು ಎಂಬುದರ ಬಗ್ಗೆಯೂ ಮಾಹಿತಿ ಇದೆ” ಎಂದು ಚೇತನ್ ರಾಜ್ ಹೇಳಿದ್ದಾರೆ.
ಸಿಗಂದೂರು ಚೌಡೇಶ್ವರಿ ದೇವಸ್ಥಾನದ ಬಳಿ ಇತ್ತೀಚೆಗೆ ಮಾತನಾಡುವಾಗ ₹50 ಲಕ್ಷ ಪಡೆದಿಲ್ಲ ಎಂದು ಹೇಳಿದ್ದರೆನ್ನಲಾದ ಹರತಾಳು ಹಾಲಪ್ಪ ಅವರಿಗೆ ಪ್ರತಿಕ್ರಿಯಿಸಿದ ಅವರು, ಹಣ ಪಡೆದಿಲ್ಲ ಎಂಬ ತಮ್ಮ ಹೇಳಿಕೆಯನ್ನು ದೇವರ ಮುಂದೆ ಪ್ರಮಾಣ ಮಾಡಿ ಸಾಬೀತುಪಡಿಸಲಿ ಎಂದು ಸವಾಲು ಹಾಕಿದ್ದಾರೆ.
ಶಾಸಕ ಬೇಳೂರು ಗೋಪಾಲಕೃಷ್ಣ ಅವರ ವಿರುದ್ಧ ಹರತಾಳು ಹಾಲಪ್ಪ ಮಾಡುತ್ತಿರುವ ಆರೋಪಗಳಿಗೂ ಚೇತನ್ ರಾಜ್ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಹೊಸನಗರ, ಸೊರಬ ಮತ್ತು ಸಾಗರ ಸೇರಿದಂತೆ ವಿವಿಧೆಡೆ ಜನರು ತಮ್ಮನ್ನು ತಿರಸ್ಕರಿಸಿದ್ದಾರೆ ಎಂದು ಟೀಕಿಸಿದ ಅವರು, ಬೇಳೂರು ಅವರ ದಾನ-ಧರ್ಮದ ಕೆಲಸಗಳ ಬಗ್ಗೆ ಆಧಾರರಹಿತ ಆರೋಪಗಳನ್ನು ಮಾಡುವುದನ್ನು ನಿಲ್ಲಿಸಬೇಕು ಎಂದು ಹೇಳಿದ್ದಾರೆ.
“ಬೇಳೂರು ಅವರು ಜನರಿಗೆ ಸಹಾಯ ಮಾಡುವುದು ಅಥವಾ ದಾನ ಮಾಡುವುದು ಹೇಗೆ ಎಂಬುದನ್ನು ಪ್ರಶ್ನಿಸಲು ನೀವೇನು ಐಟಿ ಅಥವಾ ಇಡಿ ಅಧಿಕಾರಿಗಳೇ?” ಎಂದು ಪ್ರಶ್ನಿಸಿದ ಚೇತನ್ ರಾಜ್, ಮುಂದಿನ ದಿನಗಳಲ್ಲಿ ಸಾರ್ವಜನಿಕರನ್ನು ಒಗ್ಗೂಡಿಸಿ ಭ್ರಷ್ಟಾಚಾರದ ಆರೋಪಗಳಿಗೆ ಸಂಬಂಧಿಸಿದ ವಿಚಾರಗಳನ್ನು ಜನರ ಮುಂದಿಡುವುದಾಗಿ ತಿಳಿಸಿದ್ದಾರೆ.
ಈ ಸಂದರ್ಭದಲ್ಲಿ ಬಿ.ಆರ್. ಜಯಂತ್, ಚಿದಂಬರ ಮಾರುತಿಪುರ, ಅಶೋಕ್ ಬೇಳೂರು, ಲಾವಿಗೆರೆ ಸೋಮಶೇಖರ್, ವಿನಯ್ ಗೌಡ, ನಾಗೇಂದ್ರ ಜೋಗಿ, ಗಣಪತಿ ಓಂಕಾರ, ಹುಲ್ಲುಗೊಪ್ಪ ಸುರೇಶ್, ರವೀಶ್ ನಿಟ್ಟೂರು, ಪುರುಷೋತ್ತಮ ಬೇಳಾಕರ್, ಇಂಧೂಧರ್ ಗೌಡ, ಸುಮಾ ಸುಬ್ರಹ್ಮಣ್ಯ,ವಿಶ್ವನಾಥ್ ನಾಗೋಡಿ , ಪ್ರಭಾವತಿ ಚಂದ್ರಕಾಂತ್, ಮಧುಮಾಲತಿ, ಸಯ್ಯದ್ ಜಾಕೀರ್, ಸುರೇಶ್ ಬಾಬು, ಕಬೀರ್ ಚಿಪ್ಲಿ, ಗಿರೀಶ್ ಕೋವಿ, ತಾರಾಮೂರ್ತಿ, ಶಾಸಕರ ಆಪ್ತ ಕಾರ್ಯದರ್ಶಿ ಶ್ರೀನಿವಾಸ ಮೂರ್ತಿ, ರವಿಕುಮಾರ್, ಜಿ.ಟಿ. ಸತ್ಯನಾರಾಯಣ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
