ಮತ-ಧರ್ಮದ ಹಂಗಿಲ್ಲದ ಕಾರ್ಮಿಕರ ಬೆವರು: ಗರ್ತಿಕೆರೆಯಲ್ಲಿ ಸೌಹಾರ್ದತೆಯ ಸೇತುವೆ ಕಟ್ಟುತ್ತಿರುವ ‘ಶ್ರಮದಾನ’

ಮತ-ಧರ್ಮದ ಹಂಗಿಲ್ಲದ ಕಾರ್ಮಿಕರ ಬೆವರು: ಗರ್ತಿಕೆರೆಯಲ್ಲಿ ಸೌಹಾರ್ದತೆಯ ಸೇತುವೆ ಕಟ್ಟುತ್ತಿರುವ ‘ಶ್ರಮದಾನ’ | Akila Karnataka Building Workers Association launches voluntary labor to construct a rest house for religious leaders at Garthikere Jumma Masjid in Hosanagara, promoting communal harmony and social service.

ಹೊಸನಗರ: ಸಮಾಜದಲ್ಲಿ ಜಾತಿ, ಧರ್ಮಗಳ ಹೆಸರಿನಲ್ಲಿ ಕಂದಕ ಸೃಷ್ಟಿಸುವವರ ನಡುವೆ, ಹೊಸನಗರ ತಾಲೂಕಿನ ಅಖಿಲ ಕರ್ನಾಟಕ ಕಟ್ಟಡ ಕಾರ್ಮಿಕರ ಸಂಘವು ತಮ್ಮ ಬೆವರಿನ ಮೂಲಕವೇ ಸೌಹಾರ್ದತೆ ಮತ್ತು ಭಾವೈಕ್ಯತೆಯ ಭದ್ರವಾದ ಸೇತುವೆಯನ್ನು ನಿರ್ಮಿಸುತ್ತಿದೆ.

‘ಸಮಾಜಮುಖಿ ಸೇವೆಯೇ ನಮ್ಮ ಸಂಘಟನೆಯ ಗುರಿ’ ಎನ್ನುವ ಉದಾತ್ತ ಆಶಯದೊಂದಿಗೆ, ಗರ್ತಿಕೆರೆಯ ಜುಮ್ಮಾ ಮಸೀದಿಯ ಧರ್ಮಗುರುಗಳ (ಮೌಲ್ವಿಗಳ) ವಿಶ್ರಾಂತಿ ಗೃಹ ನಿರ್ಮಾಣ ಕಾಮಗಾರಿಯನ್ನು ಶ್ರಮದಾನದ ಮೂಲಕ ನಡೆಸುವ ವಿಶಿಷ್ಟ ಹಾಗೂ ಪ್ರೇರಣಾದಾಯಕ ಕಾರ್ಯಕ್ಕೆ ಗುರುವಾರ ವಿಧ್ಯುಕ್ತವಾಗಿ ಚಾಲನೆ ನೀಡಲಾಯಿತು.

ಧರ್ಮಗುರುಗಳ ಅನುಕೂಲಕ್ಕಾಗಿ ವಿಶ್ರಾಂತಿ ಗೃಹವೊಂದನ್ನು ನಿರ್ಮಿಸಲು ಈ ಹಿಂದೆ ತಳಪಾಯ ಹಾಕಲಾಗಿತ್ತು. ಆದರೆ, ಆರ್ಥಿಕ ಮುಗ್ಗಟ್ಟು ಹಾಗೂ ಅನುದಾನದ ತೀವ್ರ ಕೊರತೆಯಿಂದಾಗಿ ಕಾಮಗಾರಿ ಅರ್ಧಕ್ಕೆ ನಿಂತಿತ್ತು. ಈ ವಿಚಾರ ತಿಳಿದ ತಕ್ಷಣ ಸ್ಪಂದಿಸಿದ ಕಾರ್ಮಿಕರ ಸಂಘವು, ಮಸೀದಿ ಆಡಳಿತ ಮಂಡಳಿಯ ಮನವಿಯನ್ನು ಪುರಸ್ಕರಿಸಿ ಶ್ರಮದಾನಕ್ಕೆ ಮುಂದಾಗಿದೆ. ಊರಿನ ದಾನಿಗಳು ಇಟ್ಟಿಗೆ, ಸಿಮೆಂಟ್ ಸೇರಿದಂತೆ ಅಗತ್ಯ ವಸ್ತುಗಳನ್ನು ನೀಡಿದರೆ, ಕಾರ್ಮಿಕರು ತಮ್ಮ ಕೌಶಲ್ಯ ಹಾಗೂ ದೈಹಿಕ ಶ್ರಮವನ್ನು ಧಾರೆಯೆರೆಯುತ್ತಿದ್ದಾರೆ. ಮುಂದಿನ 10-12 ದಿನಗಳ ಕಾಲ, ಪ್ರತಿದಿನ 08 ಜನ ನುರಿತ ಕಾರ್ಮಿಕರು ಯಾವುದೇ ಫಲಾಪೇಕ್ಷೆಯಿಲ್ಲದೆ ಈ ಪವಿತ್ರ ಕಾರ್ಯದಲ್ಲಿ ತೊಡಗಿಸಿಕೊಳ್ಳಲಿದ್ದಾರೆ. ಜುಮ್ಮಾ ಮಸೀದಿಯ ಅಧ್ಯಕ್ಷರಾದ ಬಶೀರ್ ಅಹಮದ್ ಹಾಗೂ ಸ್ಥಳೀಯ ಹಿರಿಯ ಕಟ್ಟಡ ಕಾರ್ಮಿಕರು ಜಂಟಿಯಾಗಿ ಈ ಕಾರ್ಯಕ್ಕೆ ಚಾಲನೆ ನೀಡಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಅಖಿಲ ಕರ್ನಾಟಕ ಕಟ್ಟಡ ಕಾರ್ಮಿಕರ ಸಂಘದ ಗ್ರಾಮಾಂತರ ಅಧ್ಯಕ್ಷರಾದ ಶಂಕರಾಚಾರ್ಯ ಕೆ.”ಕಾರ್ಮಿಕನ ಬೆವರಿಗೆ ಯಾವುದೇ ಜಾತಿ, ಧರ್ಮಗಳ ಬಣ್ಣವಿಲ್ಲ. ನಾವು ಕಟ್ಟುವ ಗೋಡೆಗಳು ಜನರಿಗೆ ಆಶ್ರಯ ನೀಡುತ್ತವೆಯೇ ಹೊರತು, ಮನಸ್ಸುಗಳನ್ನು ವಿಭಜಿಸುವುದಿಲ್ಲ. ಗುಡಿ, ಚರ್ಚ್, ಮಸೀದಿ ಕಟ್ಟುವ ನಮ್ಮ ಕೈಗಳಿಗೆ ಮಾನವೀಯತೆಯೇ ಅತಿ ದೊಡ್ಡ ಧರ್ಮ. ಸಮಾಜ ಸೇವೆಯೇ ನಮ್ಮ ಸಂಘಟನೆಯ ಉಸಿರು. ನಿರೇರಿ ಶಾಲೆ ಹಾಗೂ ದೇವಸ್ಥಾನಗಳ ಜೀರ್ಣೋದ್ಧಾರಕ್ಕೆ ನಮ್ಮ ಕಾರ್ಮಿಕರು ಹೇಗೆ ನಿಸ್ವಾರ್ಥ ಶ್ರಮದಾನ ಮಾಡಿದ್ದಾರೋ, ಅದೇ ಭಕ್ತಿ ಮತ್ತು ಶ್ರದ್ಧೆಯಿಂದ ಈ ಮಸೀದಿಯ ಧರ್ಮಗುರುಗಳ ವಿಶ್ರಾಂತಿ ಗೃಹವನ್ನೂ ನಿರ್ಮಿಸಿಕೊಡಲಿದ್ದಾರೆ. ಕಷ್ಟದಲ್ಲಿರುವವರಿಗೆ ಆಸರೆಯಾಗುವುದು ಮತ್ತು ಸಮಾಜಕ್ಕೆ ಒಳಿತು ಮಾಡುವುದೇ ನಿಜವಾದ ದೇವರ ಕೆಲಸ,” ಎಂದು ಹೇಳಿದರು.

​ಮಸೀದಿ ಅಧ್ಯಕ್ಷರಾದ ಬಶೀರ್ ಅಹಮದ್ ಮಾತನಾಡಿ, “ಅನುದಾನದ ಕೊರತೆಯಿಂದ ನಿಂತಿದ್ದ ಕಾಮಗಾರಿಗೆ ಕಾರ್ಮಿಕ ಸಂಘವು ಜೀವ ತುಂಬಿದೆ. ಶ್ರಮದಾನದ ಮೂಲಕ ಕೈಜೋಡಿಸಿರುವ ಕಾರ್ಮಿಕರ ಈ ನಿಸ್ವಾರ್ಥ ಸೇವೆ ಸಮಾಜಕ್ಕೆ ದೊಡ್ಡ ಮಾದರಿ” ಎಂದು ಕೃತಜ್ಞತೆ ಸಲ್ಲಿಸಿದರು.

​ಹೊಸನಗರ ಗ್ರಾಮಾಂತರ ಅಧ್ಯಕ್ಷರಾದ ಮಹಮ್ಮದ್ ಹುಸೇನ್ ಮಾತನಾಡಿ, “ನಮ್ಮ ಸಂಘ ಈಗಾಗಲೇ ಹಲವಾರು ಸಮಾಜಮುಖಿ ಕಾರ್ಯಗಳನ್ನು ನಡೆಸಿಕೊಂಡು ಬರುತ್ತಿದೆ. ನಿರೇರಿ ಶಾಲೆ, ದೇವಸ್ಥಾನ ಹೀಗೆ ತಾಲೂಕಿನಾದ್ಯಂತ ಹಲವಾರು ಕಡೆ ನಮ್ಮ ಸದಸ್ಯರು ಶ್ರಮದಾನ ಮಾಡಿದ್ದಾರೆ. ಈಗ ಮಸೀದಿಯ ವಿಶ್ರಾಂತಿ ಗೃಹಕ್ಕೂ ಅದೇ ಸೇವಾ ಮನೋಭಾವದಿಂದ ಕೆಲಸ ಮಾಡುತ್ತಿದ್ದೇವೆ” ಎಂದರು.

ಅಖಿಲ ಕರ್ನಾಟಕ ಕಾರ್ಮಿಕರ ಸಂಘದ ಜಿಲ್ಲಾ ಅಧ್ಯಕ್ಷ ಸಂಜಯ್ ಕುಮಾರ್ ಹಾಗೂ ಜಿಲ್ಲಾ ಕಾರ್ಯಾಧ್ಯಕ್ಷರಾದ ಸುಂದರ್ ಬಾಬು ಮಾರ್ಗದರ್ಶನದಲ್ಲಿ ತಾಲೂಕ್ ಅಧ್ಯಕ್ಷ ಮಹಮ್ಮದ್ ಹುಸೇನ್ ನೇತೃತ್ವದಲ್ಲಿ ಈ ಶ್ರಮದಾನ ಹಮ್ಮಿಕೊಳ್ಳಲಾಗಿತ್ತು.

​ಈ ಸಮಾಜಮುಖಿ ಕಾರ್ಯಕ್ರಮದಲ್ಲಿ ಮಸೀದಿ ಉಪಾಧ್ಯಕ್ಷ ಹಸೇನ್ ಸಾಬ್, ಕಟ್ಟಡ ಕಾರ್ಮಿಕ ಸಂಘದ ಪ್ರಧಾನ ಕಾರ್ಯದರ್ಶಿ ರಾಘವೇಂದ್ರ ಬಿ.ಎನ್., ಕಾರ್ಯಾಧ್ಯಕ್ಷ ನಾಗರಾಜ್ ಹುಳಿಗದ್ದೆ, ಹುಂಚ ಘಟಕದ ಅಧ್ಯಕ್ಷ ಸುಬ್ರಮಣ್ಯ ಎನ್.ಆರ್., ಗೌರವಾಧ್ಯಕ್ಷ ಚಂದ್ರಶೇಖರ್ ಪಿ., ಅಬ್ದುಲ್ ಖಾದರ್, ಸದಸ್ಯರಾದ ಮನ್ಸೂರ್ ಅಹಮದ್, ಸುರೇಶ್ ಅವುಕ ಸೇರಿದಂತೆ ಊರಿನ ಗಣ್ಯರು ಹಾಗೂ ಕಾರ್ಮಿಕರು ಉಪಸ್ಥಿತರಿದ್ದರು.

ಕಾರ್ಮಿಕರ ಈ ನಡೆ ಕೇವಲ ಒಂದು ಕಟ್ಟಡದ ನಿರ್ಮಾಣವಲ್ಲ; ಬದಲಾಗಿ, ಒಡೆದ ಮನಸ್ಸುಗಳನ್ನು ಬೆಸೆಯುವ, ಸಮಾಜದಲ್ಲಿ ಪರಸ್ಪರ ಪ್ರೀತಿ-ವಿಶ್ವಾಸಗಳನ್ನು ಬಿತ್ತುವ ಒಂದು ಶ್ರೇಷ್ಠ ಹೆಜ್ಜೆಯಾಗಿದೆ.