Post Office Insurance: ಕಡಿಮೆ ಪ್ರೀಮಿಯಂನಲ್ಲಿ 50 ಲಕ್ಷ ರೂ.ವರೆಗೆ ವಿಮಾ ಕವಚ – Postal Life Insurance ಸಂಪೂರ್ಣ ಮಾಹಿತಿ

Post Office Postal Life Insurance (PLI) ಯೋಜನೆ ಖಾಸಗಿ ವಿಮೆಗೆ ಉತ್ತಮ ಪರ್ಯಾಯ. ಕಡಿಮೆ ಪ್ರೀಮಿಯಂನಲ್ಲಿ 50 ಲಕ್ಷ ರೂ.ವರೆಗೆ ವಿಮಾ ಕವಚ, ತೆರಿಗೆ ವಿನಾಯಿತಿ ಮತ್ತು ದಂಪತಿಗಳಿಗೆ ವಿಶೇಷ ಪಾಲಿಸಿ ಸೌಲಭ್ಯ.

ವಿಮೆ ಎಂದರೆ ಕೇವಲ ಖಾಸಗಿ ಕಂಪನಿಗಳ ಮೊರೆ ಹೋಗಬೇಕಾದ ದಿನಗಳು ಈಗ ಬದಲಾಗುತ್ತಿವೆ. ಹೆಚ್ಚುತ್ತಿರುವ ಪ್ರೀಮಿಯಂ ದರಗಳ ನಡುವೆಯೂ, 100 ವರ್ಷಗಳಿಗೂ ಅಧಿಕ ಇತಿಹಾಸ ಹೊಂದಿರುವ ಪೋಸ್ಟಲ್ ಲೈಫ್ ಇನ್ಶುರೆನ್ಸ್ (PLI) ಸಾಮಾನ್ಯ ಜನರಿಗೆ ವಿಶ್ವಾಸಾರ್ಹ ಪರ್ಯಾಯವಾಗಿ ಹೊರಹೊಮ್ಮಿದೆ.

ಅತಿ ಕಡಿಮೆ ಹೂಡಿಕೆಯಲ್ಲಿ ಗರಿಷ್ಠ ಭದ್ರತೆ ನೀಡುವ ಈ ಸರ್ಕಾರಿ ವಿಮಾ ಯೋಜನೆ ಇದೀಗ ರೈತರು ಹಾಗೂ ಕಾರ್ಮಿಕರಿಗೂ ಲಭ್ಯವಾಗಿದ್ದು, ಗ್ರಾಮೀಣ ಭಾಗದ ಜನರಿಗೆ ಭದ್ರತೆಯ ಆಸರೆಯಾಗಿದೆ.

ಫೆಬ್ರವರಿ 1, 1884ರಂದು ಅಂಚೆ ನೌಕರರಿಗಾಗಿ ಆರಂಭವಾದ PLI, ಇಂದು ದೇಶದ ಅತ್ಯಂತ ನಂಬಿಕೆಯ ವಿಮಾ ಯೋಜನೆಗಳಲ್ಲಿ ಒಂದಾಗಿ ಬೆಳೆದಿದೆ. 1894ರಲ್ಲೇ ಮಹಿಳಾ ಉದ್ಯೋಗಿಗಳಿಗೆ ವಿಮಾ ರಕ್ಷಣೆ ನೀಡಿದ ಮೊದಲ ಸಂಸ್ಥೆಯಾಗಿ ಅಂಚೆ ಇಲಾಖೆ ಇತಿಹಾಸ ನಿರ್ಮಿಸಿದೆ. ಕಾಲಾನಂತರದಲ್ಲಿ ಸಾರ್ವಜನಿಕ ವಲಯದ ನೌಕರರು ಮಾತ್ರವಲ್ಲದೆ, ವಿವಿಧ ವೃತ್ತಿಪರರು ಮತ್ತು ಗ್ರಾಮೀಣ ಜನರೂ ಈ ಯೋಜನೆಯ ಪ್ರಯೋಜನ ಪಡೆಯುತ್ತಿದ್ದಾರೆ.

ಸುರಕ್ಷಾ ಪಾಲಿಸಿ: 50 ಲಕ್ಷ ರೂ.ವರೆಗೆ ವಿಮಾ ಕವಚ
ಪೋಸ್ಟ್ ಆಫೀಸ್‌ನ ಸಂಪೂರ್ಣ ಜೀವ ವಿಮೆಯಾದ ‘ಸುರಕ್ಷಾ’ ಪಾಲಿಸಿ ಅತಿ ಹೆಚ್ಚು ಜನಪ್ರಿಯವಾಗಿದೆ. ಈ ಯೋಜನೆಯಲ್ಲಿ ಕನಿಷ್ಠ ₹20,000ರಿಂದ ಗರಿಷ್ಠ ₹50 ಲಕ್ಷವರೆಗೆ ವಿಮಾ ಮೊತ್ತ ಪಡೆಯಬಹುದು. 19 ರಿಂದ 55 ವರ್ಷದೊಳಗಿನ ಯಾರು ಬೇಕಾದರೂ ಈ ಪಾಲಿಸಿಗೆ ಅರ್ಹರು. ಪಾಲಿಸಿ ಆರಂಭಿಸಿದ ನಾಲ್ಕು ವರ್ಷಗಳ ಬಳಿಕ ಸಾಲ ಸೌಲಭ್ಯ ಲಭ್ಯವಿದ್ದು, ಪ್ರೀಮಿಯಂ ಮೊತ್ತಕ್ಕೆ ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80C ಅಡಿಯಲ್ಲಿ ವಿನಾಯಿತಿ ಸಿಗುತ್ತದೆ.

ಒಂದೇ ಪಾಲಿಸಿ, ದಂಪತಿಗಳಿಗೆ ಡಬಲ್ ರಕ್ಷಣೆ

ವಿವಾಹಿತ ದಂಪತಿಗಳಿಗಾಗಿ ಅಂಚೆ ಇಲಾಖೆ ವಿಶೇಷ ಪಾಲಿಸಿಯನ್ನು ಪರಿಚಯಿಸಿದೆ. ಒಂದೇ ಪ್ರೀಮಿಯಂನಲ್ಲಿ ಪತಿ–ಪತ್ನಿ ಇಬ್ಬರಿಗೂ ವಿಮಾ ರಕ್ಷಣೆ ದೊರೆಯುವುದು ಇದರ ವಿಶೇಷ. ದಂಪತಿಗಳ ವಯಸ್ಸು 21 ರಿಂದ 45 ವರ್ಷದೊಳಗಿರಬೇಕು. ಪಾಲಿಸಿ ಅವಧಿ ಕನಿಷ್ಠ 5 ವರ್ಷದಿಂದ ಗರಿಷ್ಠ 20 ವರ್ಷಗಳವರೆಗೆ ಇರಲಿದೆ. ದಂಪತಿಗಳಲ್ಲಿ ಒಬ್ಬರು PLI ಪಡೆಯಲು ಅರ್ಹರಾಗಿರಬೇಕು ಎಂಬ ಷರತ್ತು ಇದೆ.

ಈ ಪಾಲಿಸಿಯನ್ನು ಮೂರು ವರ್ಷಗಳ ನಂತರ ಸರೆಂಡರ್ ಮಾಡಬಹುದಾದರೂ, ಸಂಪೂರ್ಣ ಬೋನಸ್ ಪಡೆಯಲು ಕನಿಷ್ಠ ಐದು ವರ್ಷಗಳ ಕಾಲ ಮುಂದುವರಿಸುವುದು ಕಡ್ಡಾಯ. ಖಾಸಗಿ ವಿಮಾ ಕಂಪನಿಗಳಿಗಿಂತ ಕಡಿಮೆ ಪ್ರೀಮಿಯಂ ಮತ್ತು ಹೆಚ್ಚು ಬೋನಸ್ ದರ ಇರುವುದರಿಂದ, ಅಂಚೆ ವಿಮೆ ಹೂಡಿಕೆದಾರರಿಗೆ ಆಕರ್ಷಕ ಆಯ್ಕೆಯಾಗಿದೆ.